Ka mbërritur te Spitali i Traumës 33-vjeçari Indrit Sadedini i cili u plagos rëndë në atentatin e sotëm në Vlorë. Burime për mediat bëjnë me dije se gjendja e të riut paraqitet mjaft e rëndë pasi ai ka humbur të dyja këmbët për shkak të shpërthimit të fuqishëm të tritolit.
Ai ishte duke hapur garazhin dhe në atë moment shpërtheu tritoli duke e lënë të plagosur. Siç u mësua, kjo nuk ishte hera e parë që Sadedinit i bëjnë atentat, pasi edhe më parë në vitin 2017 ka shpëtuar mirë. Në makinën e tij ishte vendosur një sasi prej 500 gramësh tritol. I riu zbriti nga shtëpia dhe u drejtua për në garazh për të marrë makinën dhe në momentin që tentoi të ngrinte qepenin shpërtheu eksplozivi. Garazhi ishte me kamera sigurie dhe shpërthimi është regjistruar. Por jo vetëm. Kamerat kanë kapur edhe autorin që ka vendosur eksplozivin.
Autori pasi vendosi bombën me telekomandë dyshohet se nuk është larguar shumë nga vendngjarja, por ka ndjekur lëvizjet e shënjestrës dhe ka pritur të që shkonte në garazh. Në momentin që Indrit Sadedini shkoi në garazh për të marrë makinën, autori shtypi butonin duke shpërthyer eksplozivin.
Pista e vetme në tryezën e hetuesve për momentin është e kaluara e vlonjatit jashtë vendit ku ka jetuar për disa kohë. Nga sa mësohet i riu nuk ka qenë i dënuar por ka disa precedentë të mëparshëm për shkak të përfshirjes në disa konflikte me persona të tjerë. Ky është atentati i dytë që i bëhet.
