Edi Rama, ka hapur fushatën e Partisë Socialiste nga Sheshi Skënderbej, ku ishin të pranishëm kandidatë të kësaj force politike.
Kryeministri e shpenzoi pjesën e parë të fjalimit, duke u marrë me kundërshtarin politik dhe organizimin e eventit të PD-së në sheshin Nënë Tereza.
Rama e kritikoi Bashën, pse mbërriti me vonesë në event dhe pse kishte thyer rregullat e pandemisë, duke mbledhur simpatizantë të shumtë në shesh. Kjo krijoi edhe një kontrast në ekran, ku në njërën anë shfaqej fushata entuziaste me simpatizantët e PD dhe nga ana tjetër, kandidatët e PS të ulur në karrige.
Më pas Rama shpjegoi përse i duhet mandati i tretë.
“Mandati i tretë i Ps nuk është për PS-në dhe për karrigen e askujt. Eshtë që Shqipëria të mos kthehet dot më kurrë mbrapa. Me mandatin e tretë ne i bëjmë të pakthyeshme reformat që janë ende rrugës. Bën të pakthyeshme reformën në drejtësi, ardhjen në fuqi në jetën tonë të një drejtësie të re. E kundërta do të thotë humbje e të gjithë këtyre përpjekjeve, sakrificave, kthim aty ku Shqipëria nuk mund, nuk duhet dhe nuk do të kthehet më”, tha Rama ndër të tjera.
