Në Selenicë “FESTIVALI I PARË FOLKLORIK I ZONËS”

Është zhvilluar sot në Selenicë Festivali i Parë Folklorik i zonës me pjesëmarrjen e grupeve polifonike nga i tërë territori që ka në juridiksion kjo njësi vendore.

Në vazhdim të përmbushjes së angazhimeve dhe vizionit për ti dhënë komunitetit të bashkisë një dimension të ri kulturor nisi kështu edicioni i parë i një aktiviteti me bazë trashëgiminë tonë kulturore shpirtërore si shenjë për tu kthyer në një event periodik të përvitshëm.

U mblodhën bashkë dhjetë grupe polifonike nga Sevasteri, Vajza, Velça, Gjormi, Kota, Drashovica, Armeni, Lubonja, Koculi e Romësi dhe që të gjithë së bashku i dhanë udhë edicionit të parë të festivalit.

I mbajtur në vigjilje të Festave të mëdha të Nëntorit, 111 vjetorit të Pavarësisë dhe 79 vjetorit të Çlirimit të Atdheut, ky aktivitet u shndrua edhe në një manifestim të madh folklori, jo vetëm nga kënga labe por edhe kostumet plot ngjyra e ornamente të lloj-llojshme.

Festivali u bë i mundur edhe falë bashkëpunimit e kontributit të Drejtorisë Rajonale të Trashëgimisë Kulturore të Vlorës, institucion që ka kohë që po kontribuon në realizimin e disa aktiviteteve të bukura në fushën e trashëgimisë kulturore për zonën me jo pak resurse në trashëgiminë shpirtërore e materiale.

Duke deklaruar të hapur festivalin, veç të tjerash deklarova vazhdimësinë e këtij aktiviteti duke e kthyer atë në një axhendë të përvitshme të bashkisë, krahas aktiviteteve të tjera me karakter kulturor e turistik.

Në festival mori pjesë e performoi edhe një ansambël nga qyteti Inegol i Turqisë të cilët u pritën me ovacione e duartoitje nga të pranishmit e shumtë të cilët ndoqën festivalin

Në festival morën pjesë e përshëndetën edhe deputeti i zonës Z. Vullnet Sinaj si dhe deputetja Teuta Rama si dhe Prefekti i Vlorës , Z. Flamur Mamaj.

Edicioni i Parë i Festivalit Folklorik të Selenicës, veç të tjerash, u konceptua edhe si një aktivitet me vlera të mëdha trashëgimie po edhe festive që kjo bashki organizoi në kuadër të 111 vjetorit të Pavarësisë Kombëtare dhe 79 vjetorit të Çlirimit të Atdheut.