Eksportet gjermane pësuan rritjen më të madhe në thuajse dy vite gjatë shtatorit, tregojnë të dhënat më të fundit që raporton ekonomia më e madhe e Europës, duke larguar të paktën për momentin frikën e madhe të një recesioni të mundshëm.

Sipas Zyrës Federale të Statistikave, eksportet gjatë muajit shtator u rritën me 1.5%. Kjo është rritja më e madhe që prej nëntorit të vitit 2017 si dhe bindshëm mbi pritshmëritë e tregjeve dhe ekonomistëve që flisnin për vetëm 0.4% rritje.

Ekonomistët shprehen se, në një kohë që nuk ka asnjë pikë dyshimi se, industria gjermane është në recesion, me këto të dhëna, ekonomia në tërësi mund ta ketë shmangur një të tillë. Në rast se eksportet nuk do të ishin rritur me një hap të tillë, atëherë me shumë gjasa ekonomia gjermane do të hynte në recesion teknik në tremujorin e tretë të vitit.

Dy tremujorë me radhë në kontraktim sjellin atë që njihet si recesion teknik. Sektori i manifakturës në Gjermani po vuan ngadalësimin global si dhe pasiguritë e biznesit që lidhen ngushtë me luftën tregtare mes dy ekonomive më të mëdha të botës.

Të dhënat e shtatorit flasin edhe për një rritje të importeve me 1.3%. Suficiti tregtar arriti në 19.2 miliardë euro.