Vasilika Rrapi është një nga elektricistet më të vjetra në Tiranë. Ky është profesioni të cilin e njeh në çdo detaj.
Ajo tregon se ishte pikërisht babai i saj që e shtyu të profilizohet në këtë degë, edhe pse nuk e kishte me dëshirë.
Vasilika Rrapi: Nuk e kam dashur, më thoshte bijë, do të marrësh këtë zanatin elektrik. Me një pincë dhe kaçavidë, më thoshte, ha bukë bijë dhe vërtet.
Me duart e bëra pis nga grasoja, kjo zonjë na tregon se e dashuron punën dhe flet me të si të ishte njeri.
Vasilika Rrapi: Ndoshta është pak e tepruar për mua si femër që të lyej duart, ti shtrembëroj nga puna, por i jam kushtuar kësaj pune dhe nuk dua t’ja di se çfarë flasin njerëzit. Kur vi në punë më përqafojnë motorët, këta më japin jetë, flas me ta përditë.
Kërkesat e klientëve për punën e saj janë të shumta, për këtë arsye Vasilika nuk mund të shkëputet prej saj pavarësisht se ka kaluar në moshën e pensionit apo problemeve shëndetësore.
Vasilika Rrapi: Me anë të punës marr frymë, lëviz, heq mendjen nga hallet.
Megjithën pasionin për të punuar, Vasilika Rrapi, e ndjen veten të pafuqishme për të vijuar, por ajo shprehet e gatshme që tu japë të gjithë dijet e saj të rinjve që e duan punën e elektriçistit.
