TIRANE- I humbur 3 muaj më parë, Vasil Nexha mbërrin në ambientet e Report TV, nënë e bir takohen live në studion e ‘Pa gjurmë’. Merr fund ‘rebelimi’ i të riut, pas hatërmbetjes me të atin dhe njerkën. Vasili u largua nga shtëpia në Greqi ku jetonte me të atin, pas divorcit të prindërve.
Emocione të papërshkrueshme gjatë transmetimit live, në këtë bashkim zemrash, kur Vasil Nexha, 22-vjecari i humbur më 30 qershor u takua me nënën.
Deri afro një javë më parë asnjë informacion nuk kishte për 22-vjeçarin, që nga dita kur u zhduk, derisa babai i tij Nikoljani nga Greqia kontaktoi me stafin e ‘Pa Gjurmë’ për të denoncuar humbjen e të birit. Një javë më pas ishte nëna e Vasilit, Vjollca Cauli që vendosi të vijë në studio në kërkim të djalit.Falë shumë telefonatave si dhe këmbënguljes në ‘Pa gjurmë’ u bë e mundur që Vasili të bashkohet me familjarët e tij.Fillimisht nëna u surprizua me një telefonatë live nga Vasil Nexha, ndërsa më pas i biri mbërriti në ambientet e Report TV. Emisioni ‘Pa Gjurmë’ e risolli mbrëmjen e së të enjtes këtë histori, duke realizuar live takimin nënë e bir, ky i fundit kishte mbërritur vetëm pak orë para transmetimit të emisionit, në Tiranë.Çaste të papërshkrueshme që lanë pa fjalë në pak minuta edhe vetë stafin ‘Pa gjurmë’.Muajin e fundit Vasili kishte qëndruar në qytetin e Korcës, ndërsa jetonte duke kërkuar ndihmën e qytetarëve atje, apo edhe nga ndonjë punë që mund te gjente. Gëzonte shëndet të mirë, por ishte i lodhur nga ana psikologjike, pasi kishte lëvizur në disa qytete në juglindje të vendit përgjatë këtyre muajve, që kishte vendosur të rrinte larg familjes. Kohë për të cilën nuk ai nuk preferoi të bënte asnjë koment.Mjaft telefonata që mbërritën gjatë transmetimit live një javë më parë, zbuluan itinerarin e mundshëm të 22-vjeçarit, fillimisht në Shtyllas (Fier)-Skrapar-Ersekë-Korçë, dyshimet se ai punonte si bari. Ky itinerar ndihmoi stafin e ‘Pa Gjurmë’, i cili udhëtoi drejt juglindjes së vendit. Atje ku mendohej se gjendej Vasil Nexha.Kjo edhe për faktin se pas zhdukjes së tij, sistemi TIMS kishte zbuluar gjurmët e 22-vjeçarit në Shqipëri, më 7 korrik të këtij viti. Pavarësisht tentativës së prindërve dhe familjarëve të tjerë ende nuk ishte mësuar asgjë, deri në ato momente, për fatin e 22-vjecarit.
