Njoftimi i përbërjes së kabinetit “Rama 3” është hapi i parë drejt qeverisë së re, por ai është jozyrtar dhe ndoshta më shumë një akt politik i Kryeministrit për të mos e lënë në momentet e fundit të afateve ligjore.
Pse politik?
Kushtetuta dhe ligjet e tjera në fuqi i japin kohë Edi Ramës që të njoftojë kabinetin deri në 10 ditë pas konstituimit të parlamentit të ri. Kuvendi i ri mblidhet dhe konstituohet në datën 10 shtator. Kjo do të thotë se limitet e Ramës për të doëzuar para Presidentit Meta përbërjen e kabinetit të ri qeveritar, së bashku me programin është data 20 shtator.
Megithatë, Rama ashtu si pas fitores së zgjedhjeve në 2017-n e njoftoi kabinetin e ri në mbledhjen e Asamblesë së Partisë Socialiste. Lëvizja mund të interpretohet edhe si hap për t’i dhënë mundësi Presidentit kohën e duhur për t’u njohur me përbërjen e kabinetit të ri dhe të shprehë rezervat, nëse ka, që në fillim të këtij procesi, pra datës 10 shtator.
Zyrtarisht, përbërja PS i dorëzoi Metës të enten Edi Ramën si kandidat për Kryeministër, për ta mandatuar atë në formimin e Qeverisë së re. Një përgjigje zyrtare nga Presidenti për këtë nuk ka, por miratimi i tij mund të mbërrijë edhe fill pas konstituimit të Kuvendit.
Pra, pa mbledhjen e parë të Kuvendit të ri dhe betimin e deputetë, konstituimin e mazhorancës dhe opozitës së re të gjitha hapat e tjerë sa i takon formimit të Qeverisë së re janë jozyrtarë. pas mbledhjes së parë, i mandatuari nga Presidenti për formimin e Qeverisë së re, në këtë rast Edi Rama paraqet përbërjen dhe programin e kabinetit të ri në Kuvend. Në rast të sigurimit të shumicës së nevojshme prej 71 deputetësh, Rama i drejtohet sërish Presidencës për t’u dekretuar dhe betuar, që është edhe hapi i fundit.
Nuk parashikohet që Presidenti Meta të nxjerrë pengesa në këtë drejtim, ndërkohë që mundësia që ai të mos dekretoë anëtarë të caktuar të kabinetit të ri ekziston, si në rastin e ministrit të Mbrojtjes, Niko Peleshi me arsyetimin e mundshëm se ndaj tij vijon në SPAK hetimi për Silicon Mix, që nga koha kur ai drejtonte Ministrinë e Bujqësisë.
Shembujt nga e shkuara e afërt në këtë skenar janë Gent Cakaj dhe Sandër Lleshaj, përkatësisht si ministër i Jashtëm dhe ministër i Brendshëm. Cakaj nuk e mori kurrë detyrën, ndërsa Lleshaj e mori atë pasi hoqi dorë nga grada e gjeneralit.
Emrat që nuk janë dekretuar më parë nga Meta për ministër janë pesë anëtarë të kabinetit “Rama 3”, pasi janë prurje të reja: Frida Krifca, e propozuar si ministre e Bujqësisë, Delina Ibrahimi si ministre e Financave, Edona Bilali si ministre pa portofol për Mbrojtjen e Sipërmarrjes, Bora Muzhaqi si ministre pa portofol për Rininë dhe Fëmijët dhe Ulsi Manja si ministër Drejtësie.
Në lidhje me Ulsi Manjën, PD e LSI i kanë bërë thirre Metës që të mos e dekretojë. Tritan Shehu dhe Enkelejd Alibeaj nga PD dhe Petrit Vasili nga LSI risollën në vëmendje përgjimet e dosjes së Dibrës të blerjes së votave, ku shfaqet edhe Manja. Sipas opozitës, vendi i Ulsi Manjës është përballë drejtësisë dhe jo në krye të saj.
