Një vajzë 15 vjeçare ka vdekur ndërsa një 18 vjeçare ka marrë lëndime të rënda pasi kanë rënë nga kati i katërt i një banese në Ferizaj.
Mediat në Kosovë raportojnë se ngjarja ka ndodhur në rrugën “Sandër Prosi” të Ferizajt të shtunën në mbrëmje, sipas policisë së Kosovës.“Me datën 21.01.2023 rreth orës 21:35 policia rajonale e Ferizajt ka pranuar një informacion se në rrugën “Sandër Prosi” në Ferizaj, dy vajza të moshës 18 dhe 15 vjet kanë rënë nga kati i 4-të i një objekti banesor.
Të njëjtat për ndihmë mjekësore janë dërguar në Qendrën Emeregjente në Ferizaj e më pas për tretman të mëtutjeshëm mjekësor ( nē gjendje të rëndë shëndetësore) janë dërguar për në QKUK-Prishtinë”.
“Njëra nga të lënduarat Z.M (F/K) e moshës rreth 15 vjeçe për pasojë ka ndërruar jetē, kjo e konfirmuar nga mjekët, ndërsa e lënduar ka mbetur A.M (F/K) e moshës rreth 18 vjecare.
Policia Rajonale e Ferizajt, hetuesit dhe krimteknikët rajonal janë në vendin e ngjarjes dhe nën autorizim të prokurorit kujdestar nga Prokuroria Themelore e Ferizajt po e hetojnë rastin”, ka thënë zëdhënësi i policisë për Ferizajn, Kanun Veseli.
