Zef Mazi foli sot për herë të parë pas emërimit si kryenegocatori i Shqipërisë në kapitullin e bisedimeve me Bashkimin Evropian duke thënë se është moment historik. Në fjalën e tij në mbledhjen e Këshillit Kombëtar për Integrimin theksoi se palët duhet të flasin nën një zë në rast se duan që puna të ketë sukses.
“Ky është një moment historik për vendin tonë. Këto janë negociatat më të rëndësishme të vendit tonë në 70 vitet e fundit. Ky shans i madh që na u dha, na motivon që përpjekjet tona dhe këtë besim t’a çojmë deri në fund. Kjo punë do të ketë sukses nëse ne do të jemi profesionistë, do të flasim në një zë.
Me përkrahjen e Këshillit, shoqërisë civile, akademikëve dhe faktorëve që kanë peshë në shoqërinë shqiptare, unë dhe grupi negociator s’do të kursehemi për të çuar më para këtë proces. Falenderoj për besimin që mu dha personalisht”, tha Mazi.
