Drejtuesi politik i Partisë Socialiste në Vlorë, Damian Gjiknuri gjatë bashkëbisedimit me një grup votuesish bëri thirrje për një pjesëmarrje masive në zgjedhjet e 25 prillit.
Në takimin e zhvilluar në ambient të hapur, të ftuar të veçantë ishin vëllezërit vlonjat Romeo dhe Donald Veshaj, të cilët janë koordinatorë të zyrës për studentët e Qarkut të Vlorës, ngritur në kryeqytet.
“Ju duhet të ndjeheni krenar kur të ftoni shokë dhe shoqe në Vlorë. Ka shumë të rinj që duhet të votojnë për Partinë Socialiste pikërisht sepse ju kthye krenaria me vepra Vlorës. Kjo nuk është propagandë por unë do të doja që të gjithë ju të jeni bashkë me shokët tuaj, t’i merrni përdore dhe të votoni për herë të parë. Të na e mundësoni që këtë ‘tren’ të nisur të zhvillimit në Vlorë të mos ta ndalim. Prandaj kemi nxjerrë dhe atë sloganin tonë që ‘Vlora Nuk Ndalet.’
Vlora nuk mund të ndalet ashtu sikurse nuk mund të ndalen të rinjtë. Të rinjtë kanë mundësinë që të bëjnë diferencën e madhe në këtë qytet”, u shpreh Gjiknuri. Ai shprehu bindjen se me pjesëmarrje sa më aktive në politikë, të rinjtë do të marrin në dorë fatet e qytetit dhe të vendit.
“Ka shumë arsye për të votuar për Partinë Socialiste. Natyrshëm që dhe ne nuk jemi perfektë, kemi shumë gjëra që si kemi bërë por jam i bindur se ne jemi ata që po shkojmë në atë drejtim që duhet dhe që po e transformojmë këtë vend. Natyrshëm, Vlora falë vëmendjes së Kryeministrit, ka një vend të veçantë. Për shkak të të gjitha investimeve të bëra, gjëra të mrekullueshme, gjithë ato vepra që u përmendën, është një qytet që na bën krenar”, insistoi Gjiknuri.
