Edhe pse Gjirokastra është shndërruar në një zonë të nxehtë të përhapjes së Covid, e klasifikuar me ngjyrën e kuqe nga ana e Ministrisë së Shëndetësisë, vonesa e përgjigjeve të testimeve vijon të mbetet në fuqi në këtë qytet.
Burime bëjnë me dije për Faxweb.al se në këtë qytet nuk kanë ardhur përgjigjet e tamponëve duke nisur që nga data 11 e këtij muaji, ndërkohë që janë rreth 200 qytetarë që kanë mbetur pa përgjigje. Mes mostrave që janë marrë janë dhe ato të vetë bluzave të bardha, mësuesve, efektivëve të Policisë apo punonjësve të tjerë në administratë.
Kjo vonesë e bën të pamundur gjurmimin e kontakteve apo parandalimin e përhapjes së covid 19. Në një dalje për mediat gjatë ditës së sotme, ministrja e shëndetëisë Ogerta Manastirliu e pranoi se vonesat janë të pranishme, por sipas saj kjo është normale duke iu referuar kapaciteteve që ka në dispozicion vendi ynë. Që prej fillimit të pandemisë në vendin tonë numri i personave që kanë humbur jetën ka shkuar në 612, ndërkohë që numri i personave që kanë rezultuar pozitivë pas kryerjes së testimeve është 27 mijë e 233.
Sa i takon javëve të fundit, shifrat vijojnë që të jenë në rritje, edhe pse qeveria është përpjekur të ndërmarrë disa masa shtrënguese si mbajtja e detyrueshme e maskës në çdo ambient, apo kufizimi i lëvizjes pas orës 22;00 të mbrëmjes.
