Ministri i Shëndetësisë në Greqi, Vassilis Kikilias, deklaroi gjatë një interviste për ANT1 se vendi është në prag të bllokimit të dytë për shkak të pandemisë së koronavirusit . Siç tha ai, “Kryeministri dhe Qeveria pranuan sugjerimin përkatës të specialistëve të sëmundjeve infektive”, ndërsa ai iu referua njoftimeve që Kryeministri do të bëjë të enjten, së bashku me Sotiris Tsiodras.
Sipas ministrit, “bllokimi do të zgjasë një muaj”. Ai vuri në dukje se sugjerimi i specialistëve të sëmundjeve infektive është mbyllja e shkollave të mesme dhe universiteteve në të gjithë vendin dhe mbajtja e shkollave fillore të hapura.
Detajet e bllokimit nuk dihen ende. “Ditët e fundit, megjithë masat, ka pasur një rritje eksponenciale të rasteve në të gjithë vendin. Ky është një sinjal alarmi sepse do të ketë më shumë presion mbi sistemin shëndetësor. Situata vlerësohet çdo ditë. Masat janë duke u studiuar dhe do të shpallen nga Kryeministri pas sugjerimeve të ekspertëve “. Këtë të mërkurë Greqia regjistroi 2,646 raste të reja dhe 18 viktima nga Covid 19.Në të njëjtën kohë, numri i pacientëve të intubuar u rrit në 179.
‘Në Greqinë Veriore kemi arritur në një pikë kulminante dhe kemi hapur shtretër të tjerë në spitale’, vazhdoi Ministri i Shëndetësisë, duke theksuar se në Atikë 72% e shtretërve janë të zënë. Duke dashur të demonstrojë përhapjen e shpejtë të virusit, Z. Kikilias tha se 12 ditë më parë vetë 20% e shtretërve të ICU në Greqinë Veriore ishin të zënë dhe tani kjo përqindje është pothuajse 80%. Disa, veçanërisht të rinjtë, nuk i ndoqën masat dhe rritja e rasteve ishte e shpejtë, nënvizoi ai.
