Duhej të ishte momenti perfekt për hakmarrjen e Totenhemit ndaj Liverpulit për atë humbje në finalen e Ligës së Kampioneve. Por në fund ka qenë përsëri skuadra e Jurgen Klop, kryesuese e kampionatit anglez, ajo që ka dalë duke buzëqeshur nga fusha e lojës edhe pse u gjet në disavantazh që në pjesën e parë të sfidës.
Herri Kejn i dha avantazhin londinezëve që në start dhe dukej se për Liverpulin gjërat do të komplikoheshin. Por më pas “të kuqtë” gjetën ritmin e tyre dhe sulmuan pareshtur në kërkim të golit, edhe pse ata që iu afruan më afër rrjetës ishin përsëri kundërshtarët të cilët goditën traversën me Son.
Kthesa erdhi në pjesën e dytë me Henderson që kaloi pa vështirësi Eriksen për të shënuar golin e barazimit. Kur mbeteshin pak më shumë se 15 minuta lojë, Mane fitoi penallti dhe Salah e transformoi qetësisht duke përmbysur rezultatin që rezistoi deri në fund e i dhuroi suksesin 2-1 Liverpulit që ktheu përsëri në 6 pikë diferencën nga Mançester Siti i vendit të dytë.
Ndërkohë, Mançester Junajtid bëri një hap para me fitoren e rëndësishme 3-1 në transfertë përballë Noruiç, në një ndeshje shumë të çuditshme. Kjo, pasi djajtë e kuq” shpërdoruan dy penallti me Rashford e Marsial që në pjesën e parë të ndeshjes.
Arsenali nga ana tjetër vazhdon të vuajë dhe është ndalur në shtëpi në barazim nga Kristal Palas edhe pse pas 9 minutave lojë kryesonte 2-0 me golat e Sokratis dhe David Luiz. Penalltia e Milivojeviç dhe pastaj goli i Ajeu në fillimin e pjesës së dytë bënë që londinezët të pësonin një tjetër ndalesë, duke rrezikuar gjithnjë e më shumë stolin e Unai Emeri. /vipsport.al/
Liverpul-Totenhem 2-1
52’ Henderson, 75’ (p) Salah / 1’ Kejn
Noruiç-Mançester Junajtid 1-3
89’ Hernandez / 21’ MekTominei, 30’ Rashford, 73’ Marsial
Arsenal-Kristal Palas 2-2
7’ Sokratis, 9’ D. Luiz / 32’ (p) Milivojeviç, 52’ Ajeu
