Kreu i Grupit Parlamentar të PS, Taulant Balla në një dalje për mediat pas mbledhjes së Shtabit të Punës, ka reaguar për vendimin e Parlamentit Holandez për negociatat e Shqipërisë.
Balla ka thënë se një vendim zyrtar për këtë çështje vjen vetëm nga Komisioni Europian, ndërkohë që ka shtuar se Shqipëria i ka përmbushur kushtet.
“Presidenca gjermane që përfundon në 31 dhjetor të këtij viti, kanë në objektivat e veta mbajtjen e konferencave të para ndërqeveritare me Shqipërinë dhe Maqedoninë e Veriut. Përsa i përket vlerësimit nëse Shqipëria i ka plotësuar detyrat e veta apo jo, vlerësimi i vetëm zyrtar është vlerësimi i Komisionit Europian që paguhet nga taksapaguesit europianë për të bërë vlerësim korrekt të pritshmërive dhe të përmbushjes së parakushteve që vendet si ne kanë pasur nga Këshilli Europian i 25 marsit deri në fund të tetorit për detyrat. Komisioni Europian ka vlerësuar së Shqipëria i ka përmbushur parakushtet për mbajtjen e Konferencës së Parë Ndërqeveritare”, ka thënë Balla.
Balla ka vijuar më tej, duke thënë se “Kam pasur një videokonferencë me Parlamentin Holandez, specifikisht me Komitetin për Çështjet Europiane në këtë Parlament ku edhe nga kolegët morëm vlerësimet për përmbushjen e disa kushteve.”
