Situata e krijuar në Kosovë pas konfirmimit të aktakuzave për krerët e UÇK-së, duke përfshirë ish-presidentin Thaçi, kreun e PDK-së Kadri Veseli, Jakup Krasniqin dhe Rexhep Selimin, ka bërë që kryeministri Hoti të mbajë ditën e sotme një mbledhje të jashtëzakonshme të qeverisë. Në fjalën e tij kryeministri kosovar u shpreh se është i bindur që Kosova do të dalë faqebardhë nga procesi në Hagë. Gjithashtu ai theksoi do të bashkëpunojë me të gjithë partnerët ndërkombëtarë pasi janë të bindur që pa drejtësi të plotë nuk mund të ketë vend për paqe.
“Falënderojmë vendet mike që na kanë ndihmuar në shtet-formimin e Kosovës. Jemi shtet i lirë, i pavarur dhe demokratik. Në këto kohë të vështira ku krahas Covid, ne po ballafaqohemi edhe me sfidën e formimit institucional për stabilizimin e republikës. Jam i bindur që para botës do të dalim faqebardhë.
Në situatën e krijuar duhet të ruhet stabiliteti i shtetit për sa i përket ushtrimit ë kompetencave kushtetuese, ne zotohemi se do të punojë me ndershmëri. Do të bashkëpunojmë me të gjithë instancat përkatëse dhe partnerët ndërkombëtarë. Presim nga të gjithë që të demonstrojnë kulturë të lartë demokratike. Jemi të bindur që pa drejtësi të plotë një vend nuk mund të ketë paqe”, tha Hoti.
