Ardi Veliu, ish-Drejtori i Përgjithshëm i Policisë së Shtetit i cili me anë të një letre dha dorëheqjen nga posti që mbante, e emëruan zv.ministër në MIE. Në atë kohë ai tha se arsyeja pse u dorëhoq nga posti që mbante ishte sepse do i përkushtohej familjes, por menjëherë pas emërimit të Gledis Nanos në vend të rij, Veliu u emërua zv.ministër. Duket se Veliu e ka marrë tejet seriozisht detyrën e tij të re dhe ka nisur pa humbur kohë të angazhohet maksimalisht në mbrojtjen e algave dhe molusqeve.
Ai ka prezantuar në Komisionin për Veprimtaritë Prodhuese ditën e sotme një projektligj që synon mbrojtjen e florës dhe faunës nënujore, duke mos lejuar më lyerjen e fundit të anijeve me lëndë helmuese që të mos dëmtohet zinxhiri ushqimor detar. “Në periudhat e hershme anijet për të mos lejuar ngjitjen e gjallesave në pjesën e poshtme të tyre kanë përdorur lëndë helmuese si arseniku apo lëndë të tjera të cilat përveç molusqeve dhe algave dëmtonin dhe mjedisin nënujor duke ndikuar negativisht në zinxhirin ushqimor të gjallesave gjallesat detare apo te biodiversiteti”,-deklaroi Veliu ndër të tjera.
