Gjykata e Durrësit ka caktuar masën e sigurisë arrest me burg për dy kushërinjtë që u kapën me kokainë në Portin e Durrësit.
A. D., 38 vjeç dhe M. Ç., 39 vjeç, i’u gjetën 7.3 kg kokainë në mjetin në pronësi të një kompanie private që transportonte pako për emigrantët në Angli.
Policia kufitare në portin e Durrësit ushtroi kontroll në një furgon me targa angleze pas dyshimeve për sende të paligjshme.
Por nga skanimi u zbulua se në furgonin e mallrave, i cili ndiqte itinerarin Shqipëri-Itali-Angli, ishin të fshehura 7 pako kokaine.
Droga ishte vendosur në një ndarje të posaçme të krijuar në furgonin e mallrave, poshtë sediljes së shoferit.
Kokaina ishte paketuar në qese vakumi. Ndërkohë që po vijojnë hetimet për identifikimin e personave të tjerë në këtë rrjet trafiku.
