E mërkura ishte një ditë tronditëse pë mbarë fansat e futbollit, pasi u nda nga jeta si pasojë e një arresti kardiak legjenda i njohur Diego Armando Maradona. Por ka patur shumë aludime dhe spekulime, ndër të cilët ishte një testament që kishte lënë Maradona, ku shprehej që trupi i tij të digjej pasi të ndërronte jetë. Ka mjaftuar ky testament dhe ‘dikush është kujtuar’. Santiago Lara, i lindur në vitin 2001 pretendon se është djali i Maradonës dhe për këtë ka kërkuar prej vitesh krahasimin e ADN-së së tij me atë të Diegos.
Mamaja e tij, Natalia Garat e kishte Maradonën kur ishte 19 vjeç dhe punonte si modele. Katër vite më vonë ajo ndërroi jetë, por pak para kësaj ajo kishte rrëfyer se Maradona është babai i Santiagos. Ky i fundit përmes avokatit të tij ndërmori rrugë ligjore dhe vazhdon me pretendimin e tij, ndërsa së fundmi kërkon zhvarrosjen e Maradonës dhe marrjen e vendimit për të mos e asgjësuar trupin e tij.
Santiago u shpreh: Unë thjesht dua të di kush jam. Nuk kam pretendime financiare. Deri në ditët e fundit para vdekjes së saj, kur iu desh të hiqte aparatin mjekësor për të folur, nëna ime i tha një grupi avokatësh se isha djali i Diegos. Ata janë njohur kur ajo punonte si modele dhe kanë shumë miq të përbashkët.
