Këshilli Evropës ka njoftuar se konferenca e donatorëve për tu ardhur në ndihmë të prekurve nga tërmeti në Shqipëri do mbahet në Tiranë. Presidentja e KiE, Ursula von der Leyen tha sot se konferenca do mbahet në fillim ose në mes të janarit dhe se mori mbështetjen e menjëhershme të të gjitha shteteve anëtare.
“Është gjë e mirë që ramë dakord për një konferencë donatorësh për Shqipërinë në Tiranë në fillim të janarit ose në mes të janarit. Ishte inkurajuese të shihnim mbështetjen e menjëhershme të shteteve anëtare për të qenë përkrah shqiptarëve,”- tha ajo.
Edhe Rama reagoi më herët në lidhje me këtë temë. “Është një lajm i shumëdëshiruar marrja mbrëmë e vendimit të Këshillit Europian për mbajtjen e Konferencës së Donatorëve në Tiranë, në fund të muajit Janar fillim të muajit Shkurt, me qëllim mbështetjen e Programit të Rindërtimit nga të gjitha shtetet anëtare të BE.
Mbajtja e premtimit që mora nga shumë prej liderëve europianë për këtë konferencë të domosdoshme, më mbush me energji e me optimizëm për suksesin e përpjekjes që të dalim të gjithë më të fortë nga kjo tragjedi, duke nisur nga motrat e vëllezërit tanë fatkeq, të cilët duhet t’i rikthejmë në shtëpi më të mira se ato që humbën, si edhe nga fëmijët e tyre, të cilëve do t’u bëjmë shkolla më të mira nga ato që kishin”, shkroi Rama.
