Komisioni i Ligjeve nisi sot në mesditë online, shqyrtimin e kërkesës së 50 deputetëve për fillimin e procedurës së shkarkimit të Presidentit të Republikës. Pikërisht në orën 12:00 presidenca i ka dërguar një dokument kthim përgjigje prej 14 faqesh këtij komisioni lidhur me këtë kërkesë.
Meta i kërkon Komisionit të dëgjohet më 10 maj. Presidenca shkruan se Kuvendi e njoftoi dje por në njoftim nuk jepet asnjë sqarim mbi arsyet se pse dërgohet, apo çfarë kërkohet prej Presidentit të Republikës, qoftë dhe referuar kërkesave proceduriale të detyrueshme për respektim nga ana e Komisionit të Ligjeve sipas Kushtetutës dhe Rregullores së Kuvendit të Shqipërisë.
Në kthim përgjigje presidenca e quan “vijimësi e përpjekjeve të dëshpëruara” dhe “proces fiktiv” të këtij Kuvendi “ilegjitim”.
“Kjo përpjekje e rradhës, që bie në kundërshtim me Kushtetutën dhe Ligjin, nuk synon asgjë tjetër, veçse shmangien e vëmendjes nga problematikat reale që po evidentohen dita ditës mbi këtë proces zgjedhor, të shoqëruara me konsumimin ekzemplar masiv të krimeve zgjedhore, të frymëzuara, dirigjuara dhe ekzekutuara nga partia në pushtet, për interesat e saj.
Kjo nismë e Kuvendit njëpartiak, është keqpërdorim i veprimtarisë ligjvënëse, si një vegël e rradhës e partisë shtet, për të zbehur vëmendjen nga kërkesat e Presidentit të Republikës, opozitës, dhe organizatave ndërkombëtare me integritet, për zbardhjen e veprimeve kriminale të kryera nga partia shtet për manipulimin e procesit zgjedhor të zhvilluar në 25 prill.”
Më tej presidenca thotë se mund ta nisin nga zbardhja e masakër elektorale dhe i vë në dispozicion një sërë provash.
“Por gjithsesi, nëse ju mendoni se jeni të aftë, jeni në kohë dhe keni ndonjë grimcëlegjitimiteti, dhe dëshironi të zbardhni vërtet krimet zgjedhore, që disa prej jush aty brenda në Kuvend kanë konsumuar, apo për të hetuar se përse autorët e krimeve zgjedhore nuk u dërguan përpara drejtësisë, atëherë i bëjmë me dije Kuvendit se, mund ta filloni këtë proces me mbledhjen dhe vlerësimin e disa fakteve ulëritëse.”
Mbledhja do të zhvillohet online nëpërmjet platformës CISCO-WEBEX.”
Dhe presidenca në mbyllje të letrës shkruan se presidenti është i gatshëm për t`u takuar, diskutuar e për tu shprehur me Komisionin e Ligjeve edhe pse virtualisht nëpërmjet platformës CISCO-WEBEX, në datën10 maj 2021, datë kjo që përkon dhe me Ditën Kombëtare të Drejtësisë Shqiptare.
