Një ditë para zgjedhjeve të 25 prillit, Komisioneri Shtetëror i Zgjedhjeve, Ilirjan Celibashi paralajmëroi votuesit që të mos paraqiten me telefona celularë në qendrën e votimit, pasi do të konsiderohet si tentativë për të fotografuar votën.
“Në ditën e votimit asnjë votues nuk duhet të paraqitet me telefon celular në qendrën e votimit. Nuk do të lejohet që votuesi të ketë telefonin celular në qendrën e votimit. Kushdo që shfaqet në qendrën e votimit me telefon celular do të konsiderohet si tentativë për të fotografuar votën. Ndaj të marrin të gjitha masat, të zgjidhin si mund që ta zgjidhin. Dhe nuk besoj se është kaq e vështirë për ta zgjidhur.
Në qendrën e votimit të mos paraqiten me telefon celular. Kjo është një masë parandaluese në kuadër të luftës për të frenuar shit-blerjen e votës”, tha Celibashi duke iu përgjigjur pyetjeve të gazetarëve. Duke folur mbi shit-blerjen e votës kreu i KQZ solli në vëmendje se për të gjithë shkelësit do të ketë penalitete dhe sanksione shumë të rënda.
“Ka pasur thirrje të herëpashershme nga KQZ, faktori ndërkombëtar dhe faktor të tjerë politik, për ti thënë ndal fenomenit të shit-blerjes së votës. Nuk e di me siguri se sa dhe si në masë edhe cilësi kjo problematikë qëndron, por si ai që e shet edhe ai që e ble është në pozitën, që nëse kjo do verifikohet do ketë penalitete dhe sanksione shumë të rënda. Shpresoj që kjo të dëgjohet.
Më shumë se kaq KQZ nuk ka ca të bëj në lidhje me këtë problematikë. Shpesh herë ka një lloj amplifikimi dhe një lloj tendence për ti ampikifikuar fenomenet, qe edhe pse ekzistojnë nuk janë në atë masë që mund të vërë në rrezik integritetin e procesit zgjedhor. Natyrshëm që kjo nuk e justifikon, qoftë edhe në një masë shumë të vogël, këtë fenomen”, shpjegoi Celibashi.
