Momo Salah është një futbollist fantastik brenda fushave të blerta, por jo vetëm. Të shumta janë gjestet e bukura të yllit të Liverpool, teksa i fundit është i mrekullueshëm. Sulmuesi egjiptian ka ndihmuar një të pastrehë nga ngacmimet që po i bënin disa të rinj dhe në fund i ka dhuruar 100 paund.
Lajmi raportohet nga The Sun, aty ku David Craig, një i pastrehë dhe lypsar, ka treguar ngjarjen. “Disa djem po më shqetësonin dhe Salah e pa gjithë skenën. Po talleshin me mua, më bënin pyetje se pse ndodhesha rrugëve dhe pse lypja. ‘Do të gjejmë një punë’, u shprehën ata duke qeshur dhe duke u tallur me mua. Momo dëgjoi gjithë bisedën, iu afrua atyre dhe iu tha: ‘Mund t’u ndodhë edhe juve një gjë e tillë në të ardhmen‘.
Kur dëgjova zërin e tij e kuptova se nuk isha në ëndërr. Më pas më dhuroi 100 paund dhe u largua. Ai është unik, një legjendë e gjallë. Kam qenë gjithmonë tifoz i tij për aftësitë futbollistike që ka, por tregoi që është një kampion dhe në jetë“, përfundon 50-vjeçari Craig. /abcnews.al
