Futbollisti i Kombëtares shqiptare, Marash Kumbulla po e shijon në maksimum aventurën e tij në Serinë A me ekipin e Hellas Verona. Mbrojtësi 19-vjeçar është kthyer në një titullar për ekipin e Ivan Jurić dhe në ndeshjet e para ka shpërblyer besimin e trajnerit duke dhuruar performanca sinjifikative.
“Nuk mund ta fsheh kënaqësinë që ndjen kur shikoj veten në Serinë A. Kam një ndjesi të çuditshme. Emocionet janë të mëdha sa herë zbres në fushë. Shpresoj të mësohem me këtë ndjesi. Jam shumë krenar që jam pjesë e këtij klubi dhe luaj në një nga ligat më të forta në Europë. Jam 19-vjeç dhe nuk është diçka e zakonshme. Hapat e para në futboll i kam hedhur kur isha 8 vjeç dhe pikërisht në këtë klub. I kujtoj ende provimet e para dhe të kalosh nga ekipet e fëmijëve, në Serinë A duke luajtur kundër Juves është fantastike”, tha Kumbulla në rubrikën “A tu per tu”, në kanalin e klubit.
Në pesë ndeshjet e para Verona ka dhuruar ndeshje pozitive ndërsa 19-vjeçari është përballur me kundërshtarw si Ronaldo, Higuain, Dybala, Pionetk apo suso.
“Stadiumi i Veronës më elektrizon, sepse jam edhe tifoz i kësaj skuadre. Debutimi ndaj Bolonjës ka qenë një emocion i madh. Në minutat e para mbaj mend që rrëshqita, por në fund gjithçka shkoi mirë. Çdo ndeshje ka pasur specifikat e veta, por deri më tani kam vuajtur më shumë ndaj Dybala”, shtoi 19- vjeçari, që më pas u ndal te trajneri.
“Kampionati italian është shumë i vështirë, por të luash me fanellën e klubit që të rrit, është emocion i papërshkrueshëm. Juriç më ka dhënë besim, por edhe më detyron të punoj shumë. Trajnerët e Veronës i kam të gjithë në zemër, e sidomos ata me të cilët kam punuar. Kur isha i vogël kam luajtur në mesfushë por herën e parë që luajta me Veronën, më kthyen në mbrojtje. Tani më pëlqen shumë ky pozicion dhe aty dua të luaj. Po e shijoj.”, deklaroi Kumbulla.
