Kursi i këmbimit/ Leku i qëndrueshëm ndaj valutave të huaja

Tregu i këmbimit valutor vendas vijon të jetë i qëndrueshëm dhe monedha vendase Lek është në pozita të konsoliduara në raport me valutat e huaja, pavarësisht ndikimeve negative që ka sjellë pandemia COVID-19 në ekonomi, bën të ditur Banka e Shqipërisë. Sipas kursit zyrtar të Bankës së Shqipërisë, dollari amerikan në fund të muajit qershor u këmbye me 110.42 kundrejt 110.77 lekë që ishte në fillim të këtij muaji. Ndërsa monedha europiane euro u këmbye me ndryshime të papërfillshme në raport me lekun, gjatë muajit qershor, në kuotën mesatarisht të 124.23 lekëve. Leku regjistroi pozita të qëndrueshme edhe ndaj, paundit britanik e frangës zvicerane. Përkatësisht këto monedha u këmbyen mesatarisht gjatë muajit qershor, me 138.12 lekë dhe 116.38 lekë.