Franca paralajmëroi sot Turqinë se Mesdheu Lindor nuk mund të jetë “një shesh loje” për “ambiciet” kombëtare, ndërkohë që tensionet vazhdojnë të rriten mes Ankarasë dhe Athinës për kërkimin e hidrokarbureve në këtë zonë. “Mesdheu Lindor nuk mund të jetë një shesh loje për ambiciet e disave, kjo është një e mirë e përbashkët”, deklaroi ministrja franceze e Ushtrisë, Florence Parly në Twitter, ndërkohë që Parisi, Roma, Athina do të vazhdojnë një manovër ushtarake të përbashkët deri të premten në këtë sektor. “Mesdheu Lindor po transformohet në një hapësirë tensionesh. Respektimi i të drejtës ndërkombëtare duhet të jetë rregull dhe jo përjashtim”, shtoi Parly. “Mesazhi ynë është i thjeshtë,
përparësia ndaj dialogut, bashkëpunimit dhe diplomacisë në mënyrë që Mesdheu Lindor të jetë një hapësirë e stabiliteti dhe e respektimit të ligjit ndërkombëtar”, theksoi Parly. “Franca do të angazhojë tre avionë luftarakë Rafale, një fregatë dhe një helikopter në manovrat e përbashkëta”, shtoi ministrja franceze e Ushtrisë.Zbulimi këto vitet e fundit i zonave të gazit në Mesdheun Lindor ka ngjallur tensione të ashpra mes Ankarasë dhe Athinës, që pretendojnë për disa zona detare.