Largimi i Leo Messit nga Barcelona është rikthyer sërish në modë. Mediat e ndryshme europiane flasin për një interesim të Manchester Cityt dhe Juventusit dhe Pep Guardiola është ndalur te kjo çështje.
Trajneri spanjoll është shumë i lidhur me yllin argjentinas, por ai mohon mundësinë që kapiteni i Barcelonës të transferohet te skuadra e tij. 49-vjeçari shkon edhe më tej dhe shpreson që “pleshti” të mbyllë karrierën në “Camp Nou”.
“Nuk ekzistojnë mundësitë e blerjes së Messit. Leo është një futbollist i Barcelonës dhe dëshiroj që të qëndrojë aty. Mendoj se do e mbyllë karrierën tek ai ekip“, thekson Pep Guardiola, i cili punoi katër sezone me Messin, ku fitoi shumë trofe, mbi të gjitha 2 Champions League dhe 3 tituj kampionë.
