Lezhë/ Dyshime se po përgatitnin një vrasje, arrestohen 3 persona të armatosur, SPAK interesohet për çështjen
Tre persona, Vinçent Piroli, Kristian Ymeri alias Shkambi dhe Elden Tarja, janë arrestuar në Lezhë, pasi lëviznin me një motor të vjedhur dhe mbanin armë zjarri. Sipas hetimeve paraprake, ata dyshohet se po përgatiteshin të kryenin një vrasje.
Policia ndërhyri pas informacioneve të marra nga banorët dhe pamjeve të kamerave të sigurisë. Gjatë kontrolleve u sekuestruan armë zjarri, telefona celularë, një automjet tip “Volkswagen” dhe motori i vjedhur në Suedi.
Sipas raportimeve, SPAK ka shfaqur interes për çështjen, për të verifikuar lidhjet e mundshme të të arrestuarve me grupe kriminale të dyshuara për vrasje me pagesë.
Hetuesit po verifikojnë gjithashtu dyshimet për një lidhje të mundshme me atentatin në Sarandë, ku mbeti i vrarë “Tani i Ruzhdiut”. Deri më tani, kjo lidhje nuk është konfirmuar zyrtarisht.
