Barcelona dominon, shënon, por në fund eliminohet me bujë nga Liga e Kampionëve. Katalanasit regjistruan vetëm një barazim 1-1 në ndeshjen e kthimit përballë Paris Saint Germain, duke i dhënë lamtumirë turneut më të rëndësishëm Europian që në raundin e 1/8-ave.
Spanjollët ishin më kërkues në fushën e blertë, por penalltia e shndërruar në gol nga Mbappe ia bëri tepër të vështirë misionin kualifikim. Supergoli i Messit në minutën e 37-të u duk se i dha një tjetër ritëm ndeshjes, megjithatë nuk ndryshoi rrjedhën e këtij 90 minutëshi. Penalltia e humbur në fundin e pjesës së parë nga Messi bëri që rezultati 1-1 të qëndronte në fuqi deri në fund. Kampionët francez vijojnë më tej rrugëtimin në Champions me rezultatin e përgjithshëm, 5-2.
Në raundin tjetër kaloi dhe Liverpool. Kampionët e Anglisë kaluan me rezultatin e përgjithshëm 4-0 Leipzig. The Reds fituan 2-0 në takimin e zhvilluar në “Puskas Arena” falë golave të Sala-h dhe Mane. Tashmë janë mësuar edhe 4 skuadrat e para çerekfinaliste të Ligës së Kampionëve, ku bashkë me PSG dhe Liverpool janë kualifikuar Porto e Borussia Dortmund.
