Kryetari i Partisë Demokratike, Lulzim Basha, përmes një reagimi në Twitter, i përgjigjet deklaratave të sotme të kryeministrit Edi Rama, sipas të cilit, kreu i opozitës duhet ti përgjigjet akuzave për atë çfarë ka ndodhur në Kosovë. Sipas Bashës, këto janë thjesht sulme politike dhe gënjeshtra.
Lulzim Basha: Ndërsa vendi po thyen rekordet e infeksioneve, Rama merret vetëm me sulme politike dhe gënjeshtra. Bashkë do të sjellim shpresë të re për Shqipërinë me një qeveri që do të punojë vetëm për njerëzit!
Nëse Rama do kishte investuar kohën e tij sot, në shërbim të qytetarëve në vend që të cicëronte gënjeshtra kundër meje, mbase do të kishte arritur të shpëtonte disa nga 8 qytetarët që humbën jetën nga Covid-19 sot.
“Lulëzim e bërë atë parti si leckë për këpucët e tua! Dil fol vetë për akuzat që nuk t’i bëj unë, po dëshmitarë të masakrave e të betejave për liri në Kosovë, që as i njoh as i kam takuar kurrë! Sharjet e akuzat ndaj meje nuk janë as argumenta, as shpjegime, po thjesht bishtnime!“, shkruante pak më herët Rama në Twitter.
Ish prokurori Special John Clint Williamson, në një intervistë ekskluzive për RTV Ora, u shpreh se akuzat në adresë të Lulzim Bashës, si i përfshirë në ngjarje të rënda në Kosovë dhe jo vetëm, janë të pavërteta.
“Unë nuk dua të hyj në çështje të brendshme politike në Shqipëri ama sugjerimet se z. Lulzim Basha është i përfshirë në hetimin e trafikimit të organeve janë kategorikisht të pa vërteta“, do të shprehej ndër të tjera Williamson.
