Një efektiv policie në Fier është kthyer në hero ditën e djeshme kur ka shpëtuar tre persona të cilët ndodheshin në një makinë që u kthye përmbys në Qafën e Koshovicës.
Drejtori i Përgjithshëm i Policisë së Shtetit, Ilir Proda, ka vlerësuar dhe falënderuar Inspektor Klajdi Mustaj për aktin e guximshëm dhe përgjegjshmërinë e treguar gjatë një ndërhyrjeje për shpëtimin e tre qytetarëve të dëmtuar në një aksident rrugor në aksin Levan-Fier.
Për kontributin e tij të veçantë dhe përkushtimin ndaj jetës së qytetarëve, Drejtori i Policisë i ka akorduar inspektorit Mustaj Certifikatën për Shërbime të Dalluara.
Në mesazhin e tij, Drejtori Ilir Proda thekson:
“Veprimi i Inspektor Klajdi Mustaj është shembull frymëzues dhe pasqyron misionin e Policisë së Shtetit: të jemi aty ku qytetarët kanë më shumë nevojë për ne. Guximi, profesionalizmi dhe reagimi i shpejtë në shpëtimin e jetëve janë meritë e punonjësve tanë dhe motivojnë të gjithë trupën policore.”
Drejtori shprehu mirënjohje për të gjithë stafin e Policisë së Shtetit, duke theksuar se “angazhimi, përkushtimi, profesionalizmi, sakrifica, ndershmëria dhe humanizmi duhet të jenë motoja jonë në përmbushjen e detyrës dhe fytyra e re e Policisë së Shtetit.”
Inspektor Klajdi Mustaj është pjesë e Policisë së Shtetit që nga shkurt 2024, pas përfundimit të Kolegjit Profesional për Patrullë të Përgjithshme. Ai ka përfunduar studimet bachelor në Shkencat Juridike dhe aktualisht vijon studimet për master.
