Eksplorimi i planetit të kuq Mars është një hap më afër tashmë për kinezët. Pas testimeve dy vjeçare, Agjencia Kineze e Hapësirës dje ka lëshuar në hapësirë një nga raketat më të fuqishme në botë. Raketa “Long March 5” u nis që nga baza në Uençang, në ishullin Hainan, këtë të premte, duke mbartur një satelit Shixhian 20. Edhe pse lëshimi ishte me sukses, kinezët nuk kanë shumë kohë të festojnë.
Agjencia synon që brenda tre muajve të ardhshëm të udhëheqë vallen e eksplorimit ndërplanetar. Pritet që në muajin mars 2020, Kina të dërgojë edhe robotin e parë në planetin e kuq. Raketa u lëshua në orën 12:45, dhe sateliti u dërgua në orbitë pas 33 minutash, sipas agjencisë kineze të lajmeve, Çinhua.
