Franca është nga vendet më të prekura nga sëmundja e koronavirusit por qytetarët pjesërisht janë sensibilizuar me masat kundër epidemisë. Në ditët me diell, grupmoshat më pak të rrezikuara vazhdojnë të frekuentojnë hapësirat publike.
Kryeqytetasit e Francës duket se e kanë shpërfillur udhëzimin e qeverisë për të ruajtur distancat me njëri-tjetrin për të mos përhapur koronavirusin.
Pak orë pasi kryeministri i vendit, Eduard Filip, njoftoi masat për kufizimin e bashkëveprimeve sociale, kyçjen e dyqaneve, të restoranteve dhe aktiviteteve zbavitëse, grupe qytetarësh të Parisit u rreshtuan të dielën në argjinaturat e lumit të Senës apo përqark muzeut të Luvrit, për të shijuar diellin e rrallë.
Nga dita e hënë janë mbyllur edhe shkollat, duke i vënë studentët në ankth si ta kalojnë kohën e lirë.
“Pushimeve tona i është shtuar pezullimi i mësimit për dy deri në tre javë. Këtë kohë unë nuk mund ta shpenzoj e mbyllur,” thotë një studente 19-vjeçare.
“Për ne që jetojmë në Paris, dhe që na mungojnë kopshte, na duhet dielli, sidomos me një mot si ky. Megjithatë, kemi marrë masa, lajmë duart, shmangim transportin publik dhe ruajmë distancën me tjetrin,” shton një bashkëstudente franceze.
Vendi të dielën iu drejtua edhe kutive të votimit për të zgjedhur kryetarët e bashkive dhe komunave.
Nga frika e epidemisë, pjesëmarrja ishte nga më të ulëtat historike në 46 për qind, dhe qeveria po mendon anulimin e raundit të dytë këtë fundjavë.
Pas Italisë, Spanjës dhe Gjermanisë, Franca është vendi më i prekur në Europë me mbi 5 mijë raste me koronavirus, nga të cilat më shumë se 1 mijë vetëm ditën e diel, ndërsa mbi 127 kanë ndërruar jetën.
