Dy persona të tjerë vdiqën nga koronavirusi në Francë, duke e çuar numrin e përgjithshëm të vdekjeve në nëntë, ndërsa 154 raste të reja u identifikuan nga mbrëmja e së enjtes.
Franca, një nga qendrat kryesore të epidemive në Evropë, tani ka 577 raste të konfirmuara me koronavirus.
Në Mbretërinë e Bashkuar, gjithsej 163 njerëz kanë dalë pozitiv ndaj koronavirusit, krahasuar me 115 më parë, thanë sot autoritetet mjekësore.
Një burrë ka vdekur nga virusi, tha Departamenti i Shëndetit dhe Shërbimi i Shëndetit Publik i Anglisë. Disa media britanike raportuan më herët sot se kishte një vdekje të dytë.
Dy punonjës të British Airways janë gjetur pozitivë në koronavirus, ata janë vetëizoluar në shtëpi dhe po kurohen, tha sot linja ajrore.
Në Holandë, numri i konfirmuar i rasteve sot ishte 128, nga 82 dje, thanë zyrtarët shëndetësorë dhe vendi regjistroi vdekjen e parë nga virusi.
Instituti Kombëtar i Shëndetit Publik ka konfirmuar shifrat e fundit në azhurnimet e të dhënave ditore. Rasti i parë fatal është një 86-vjeçar që vdiq në një spital në Roterdam.
Në Zvicër, numri i personave të diagnostikuar me koronavirusin e ri u rrit në 210, tha Daniel Koch, kreu i sëmundjeve infektive në shërbimin kombëtar të shëndetit publik, në një konferencë për shtyp në Bern.
Ai shtoi se një burrë humbi jetën një ditë më parë nga virusi.
Numri i personave të infektuar me koronavirusin e ri në të gjithë botën ka tejkaluar 100,000 sot, sipas një regjistrimi të Reuters bazuar në raportet nga ministritë e shëndetësisë dhe zyrtarët e qeverisë. /Ora News.tv/
