Me inxhinierin e pyjeve, Mustafa Dedenika, gjatë aksionit të pastrimit në Pyllin e Sodës, folëm për kohën kur u mbollën 6 milion pishat që i dhuruan mushkëritë Vlorës, bimët medicinale që mblidheshin po aty, mënyrat e mirëmbajtjes dhe gjithë ç’mund të bëjmë, të gjithë bashkë, për ta ruajtur këtë pasuri të qytetit.
Përvoja e tij, më shumë se 60 vjeçare, na shërben të gjithëve, kujtesës së qytetit por sidomos të ardhmes së tij.
Dedenika nuk lodhet asnjëherë së foluri e së shëtituri mes pishave të pyllit, si e si të ndihmojë të ardhmen e shëndetshme të mjedisit, ajrit dhe të gjithë qytetit. Askush më shumë se Mustafa Dedenika nuk mund t’i bashkohej aksionit në Pyllin e Sodës, vendi që pastrohet ditën e ndotet natën.
Dedenika njeh secilën prej 6 milion pishave të pyllit sepse që prej 1956 ka qenë inxhinieri që ka mbjellë, ka rritur dhe është kujdesur për çdo pemë. Sot më ndihmoi të njihja më mirë historinë e mushkërive të Vlorës, por edhe se si të përpiqemi ta mbrojmë e kujdesemi që t’i shtojmë jetëgjatësinë.
Përpjekja për të pastruar Pyllin e Sodës nuk do të ketë asnjëherë rezultat nëse nuk ndërgjegjësohemi për t’i hedhur mbeturinat aty ku kanë vendin! Sot gjetëm sërish gjithfarë pajisjesh higjeno sanitare, dyshek, jastëk e gjithë ç’tjetër nuk u është dashur më në shtëpi.
U kërkoj të gjithë banorëve, të zonës ose jo, të denoncojnë çdo rast abuzimi me të cilin ndeshen, në pyll apo në qytet. HIDHINI MBETURINAT NË KOSH!
