Ndue Zefi, autori i vrasjes së 45-vjeçarit Martin Ndrecës deklaroi ditën e djeshme përpara organit të akuzës arsyet e krimit të rëndë. Autori është shprehur se me viktimën kishte pasur njohje të vjetra, pasi kishin jetuar për shumë vitë në të njëjtin fshat.
Ndërsa sot Gjykata e Durrësit ka vendosur të lërë në burg 38-vjeçarin Ndue Zefin, ku përpos deklaratave të tij ai ishte shprehur gjithashtu se viktima Martin Ndreca e kishte prerë në besë, pasi ai i kishte ngacmuar gruan.
Ngjarja ndodhi pak ditë më parë në zonën e ish Kënetës në Durrës. Pas vrasjes autori ka shkuar në Pukë, në vendlindjen e tij dhe disa ditë më vonë është dorëzuar në Policinë e Shkodrës. 38-vjeçari akuzohet për veprat penale të “Vrasjes në rrethana cilësuese” dhe “Mbajtjes pa leje dhe prodhimi i armëve, armëve shpërthyese dhe i municionit”.
Deklarata e Ndue Zefit:
Me Martinin kemi njohje të vjetër, sepse kemi jetuar në fshatin Adriatik për disa vite. E konsideroja njeri të besuar, por më preu në besë. Kisha dëgjuar llafe të ndryshme, që kanë të bëjnë me çështje nderi. Atë ditë (ditën e ngjarjes) shkuam për t’i kërkuar llogari për veprimet e tij, nuk u morëm vesh si njerëz pasi u soll në mënyrë arrogante, duke mos më lënë asnjë zgjidhje tjetër. U përplasëm fillimisht në lokal, pastaj edhe në vendin ku ndodhi krimi.
Qëllova në drejtim të tij disa herë me vetëdije të plotë, pasi e kishte hak plumbin.”
