Kontrolli i Lartë i Shtetit bën “për ujë të ftohtë” Ministrinë e Bujqësisë, lidhur me menaxhimin e peshkimit dhe akuakulturës.
Pas auditimit të këtyre dy sektorëve, KLSH-ja ka arritur në përfundimin se ministria ka dështuar. Ndër arsyet kryesore për keqmenaxhimin e këtij sektori përmenden moszbatimi i kuadrit ligjor (mungesa e akteve nënligjore) dhe mbulimi i plotë i monitorimit të të gjithë zinxhirit të aktivitetit të peshkimit.
MIDHJET
KLSH e thotë hapur. Midhjet vendëse nuk janë aspak të sigurta për konsumatorin. Kjo, për shkak se jo e gjithë sasia e hedhur në treg ka kaluar nga Qendra për Grumbullimin dhe Depurimin e tyre në Sarandë për certifikim, ashtu siç e kërkon ligji.
“Qendra e Grumbullimit dhe Depurimit të Midhjes Sarandë nuk siguron që e gjithë sasia e prodhuar e midhjeve të kalojë në qendër për certifikim, etiketim apo depurim sipas klasifikimit, pra sasia e midhjeve të hedhura në treg nuk klasifikohet dhe certifikohet nga kjo qendër sipas kërkesave ligjore. Konsumatorët konsumojnë midhje pa asnjë kontroll”, citohet në raportin e auditimit.
PESHKIMI
Sa i takon peshkimit, sipas KLSH-së, zinxhiri i këtij aktiviteti është i pakontrolluar nga ministria 24/24, menaxhohet në mënyrë joefektive dhe ka probleme të dukshme në infrastrukturë. Problemet e cituara në raportin e auditimit janë të shumta.
Anijet e peshkimit kryejnë aktivitetin e tyre në kundërshtim me ligjin, të katër portet e peshkimit menaxhohen në mënyrë joefektive dhe kanë probleme të dukshme në infrastrukturë, probleme të furnizimit me ujë dhe energji në portet e peshkimit e shumë të tjera si këto.
“Asnjë nga katër portet e peshkimit nuk ka kapacitetet e duhura ankoruese për të gjithë flotën e peshkimit. Këto hapësira zvogëlohen edhe më shumë, duke marrë parasysh anijet e zhytura (portet e peshkimit Vlorë dhe Shëngjin), zënien e hapësirave të ankorimit nga mjetet private turistike (porti i peshkimit Vlorë) apo mungesën e bankinave ankoruese”.
Edhe pse Ministria e Bujqësisë ka ndërmarrë disa masa në harkun kohor të dy viteve, 2016-2018, sipas KLSH-së, ato kanë qenë të pamjaftueshme. Të gjitha këto kanë bërë që KLSH-ja të përpilojë një listë të gjatë me rekomandime drejtuar Ministrisë së Bujqësisë dhe Drejtorisë së Shërbimeve të Peshkimit dhe Akuakulturës.
REZULTATET E AUDITIMIT
• Anijet e peshkimit kryejnë aktivitet pa qenë të pajisura me pajisjen përkatëse të identifikimit dhe lokalizimit automatik, kjo në kundërshtim me ligjin nr. 64/2012 “Për peshkimin”, i ndryshuar.
• Aktiviteti i peshkimit dhe akuakulturës nuk monitorohet me inspektim dhe kontroll 24/7, si rezultat inspektorët e peshkimit nuk mund të kontrollojnë peshkimin e paligjshëm, të paregjistruar dhe të paraportuar.
• Portet e peshkimit të vendit tonë menaxhohen në mënyrë joefektive dhe kanë probleme të dukshme në infrastrukturë. Asnjë nga katër portet e peshkimit nuk ka kapacitetet e duhura ankoruese për të gjithë flotën e peshkimit.
• Të gjitha portet e peshkimit kanë probleme në furnizimin me ujë dhe energji elektrike. Në portin e peshkimit Vlorë, një pjesë e konsiderueshme e hapësirave është e zënë me mjetet e sekuestruara nga Policia Rrugore.
• Ekonomitë e rritjes së rasatit të koranit në Lin dhe krapit në Zvezdë nuk furnizohen mjaftueshëm me ujë dhe cilësia e tij nuk është në parametrat e duhura.
• Sasia e midhjeve të hedhura në treg nuk klasifikohet dhe certifikohet nga kjo qendër sipas kërkesave ligjore.
