Ministri në detyrë për Europën dhe Punët e Jashtme, Gent Cakaj, priti sot ministrin e Jashtëm të Austria, Alexander Schallenberg dhe ministren e Shtetit për Kushtetutën dhe Bashkimin Europian, Karoline Edtstadler të cilët ndodhen në vizitë zyrtare në Tiranë. Cakaj u shpreh se ministrat vlerësuan marrëdhëniet e shkëlqyera dypalëshe që gëzojnë dy vendet dhe bashkëpunimin shumë të vyer në organizata ndërkombëtare.
“Austria ka mbështetur fuqimisht çeljen e negociatave për anëtarësim në BE, Kryesinë e OSBE-së nga ana e Shqipërisë për vitin 2020 dhe sot dy ministrat austriakë konfirmuan edhe një herë mbështetjen e tyre, që Shqipëria të marrë ulësen e anëtarit jo të përhershëm të Këshillit të Sigurimit 2022-2023”,- theksoi Cakaj. Gjatë vizitës zyrtare, dy ministrat austriakë dhuruan edhe një sasi të konsiderueshme pakosh humanitare e pajisjesh mjekësore, për të lehtësuar përballimin e pasojave të COVID-19 në Shqipëri.ATSH
