Doktori i njohur neurolog Fatos Jaho deklaron se prishja e teatrit nuk ka asnjë lidhje me cënimin e vlerave kulturore e aq më pak demokracisë, por me ata persona që duan protagonizëm. “Më vjen keq kur shikoj pamjet e prishjes së ndërtesës së Teatrit Kombëtar, sepse jam rritur dhe me atë copëz Tiranë, madje kur kam qenë fëmijë, kam luajtur dhe unë atje dhe sa e sa herë jam ulur në ato karrige për të parë e shijuar lojën e aktorëve të mrekullueshëm, që dikur i njihja të gjithë.
Por ndërtesa duhej prishur. Këtë e tregon vetë pamja e prishjes, me sa lehtësi ajo ndërtesë ra përdhe. Rënia e saj nuk ka lidhje me cënimin e trashëgimisë kulturore e historike dhe nuk ka fare lidhje me cënimin e demokracisë“, shprehet Jaho. Sipas tij, problem janë një grup njerëzish, pjesa më e madhe e të cilëve, janë persona anonime në vlera, në krizë identiteti dhe profesioni, që ndjejnë nevojën histerike për protagonizëm.
“Një pjesë e vogël nuk arrijnë të ruajnë ekuilibrin e tyre emocional, nostalgjinë e paskan më të fortë se ndjesinë për të ardhmen dhe kjo i bën thjesht antikonformistë për gjithçka. Por ajo që e nxjerr jashtë loje këtë “ lëvizje”, është politika. U turrën të marrin sa më shpejt “situatën “ në kontrollin e tyre, gjetën një “kauzë” që do t’u japë energjinë dhe motivet e munguara. Pra, përpara në luftë për liri, demokraci, kundër krimineleve, kundër diktaturës”, deklaron Jaho. Jaho shprehet se kjo maskaradë e politikës duhet të marrë një përgjigje nga cilido.
