Mjeku nga Kosova që punon në Gjermani, Kujtim Pllana, para katër ditësh ka marrë dozën e parë të vaksinës Pfizer–BioNTech. Pllana, i cili është duke specializuar për anesteziologji dhe punon në spitalin “St. George Klinikum” në Eisenach, u shpreh në një intervistë për Klan Kosovën se vaksinimi i mjekëve dhe infermierëve në Gjermani ka filluar më 27 dhjetor. Ai po ashtu ka sqaruar se marrja e kësaj vaksine nuk është e detyrueshme. Pllana tha se nuk ka pasur simptoma dhe pasi ka marrë vaksinën është kthyer në punë.
“Unë me 27 nëntor kam qenë në karantinë pasi kam qenë në kontakt me një person pozitiv. Unë e kam marrë me 19 Janar kur disa të tjerë kanë marrë dozën e dytë. Në Gjermani vaksina nuk është obligative dhe secili vendos vetë nëse do ta marrë apo jo.
Unë e kam marrë vaksinën në mëngjes dhe gjithë ditën kam punuar. Kam pasur dhimbje vetëm në vendin e shpimit. Janë parë disa simptoma pas marrjes së dozës së dytë, temperaturë pas 24 orësh por vetëm kaq”, është shprehur ai ndër të tjera.
