Studentët e Universiteteve të Tiranës kanë nisur marshimin në drejtim të kryeministrisë në ditën e 13-të të protestës dhe qëndresës së tyre. Për pak minuta studentët, që duhet thënë sot janë të shumtë në numër kanë bllokuar rrethrrotullimin pranë Fakultetit Ekonomik dhe 21 Dhjetorit duke shkaktuar kaos në trafik.
Po ashtu studentët në shenjë proteste i kanë vendosur shiritat e kuqë rektoratit që gjendet pranë Universitetit Politentik.
Ata kanë paralajmëruar se protesta do të intesifikohet dhe do të radikalizohet në rast se kërkesat e tyre që tashmë bëhen të ditura nuk do të plotësohen. Një prej studentëve tha për gazetarin e Fax News Sokol Dema se në rast se Rama nuk plotëson kërkesat e tyre ata nuk do të paguajnë tarifat e këtij viti akademik.
“Ne nuk do ti paguajmë fare tarifat në rast se kryeministri nuk na i plotëson kërkesat, Ne jemi të gjithë dhe do të veprojmë të bashkuar. Sot do të ketë dhe qytetarë që do të na bashkohen, së bashku me prindërit tanë”, u shpreh studenti. Ndërkohë që sot drejt Tiranës janë nisur grupe studentësh dhe nga Korça, Elbasani dhe Shkodra.
Bashkimi i studentëve te kryeministria pritet të ndodhë pas pak, nga ku pritet të deklarohet dhe ecuria e mëtejshme e protestës.
