Të gjithë pasagjerët e prekur nga vonesat/anulimet e fluturimeve të datës 19 janar 2020, për shkak të motit të keq do të udhëtojnë sot drejt destinacioneve të tyre, por me vonesa.
Autoriteti i Aviacionit Civil njoftoi të gjithë pasagjerët e prekur nga vonesat/anulimet e fluturimeve të djeshme për/nga Aeroporti Ndërkombëtar i Tiranës, se për shkak të mjegullës së dendur, kompanitë ajrore Air Albania, Alitalia, Austrian Airlines, Albawings, Air Serbia, Blue Panorama, Pegasus dhe Wizz Air, do t’i kryejnë të gjitha fluturimet e vonuara/anuluara brenda ditës së sotme, por me vonesa.
“Pasagjerët duhet të presin udhëzimet nga kompanitë ajrore dhe të zbatojnë oraret që do të marrin prej tyre, përpara se të nisen për në aeroport”, – thekson AAC.
AAC informon publikun, se ngjarje të tilla të lidhura me kushtet të pazakonta të motit janë të pranueshme në industrinë e aviacionit, ku kryesore për pasagjerin mbetet siguria në operim./k.s/j.p/atsh
