Kryeministri Edi Rama u shpreh sot i kënaqur që naftëtarët e Ballshit e pranuan propozimin e qeverisë. Në një reagim, pas pranimit të propozimit të naftëtarëve, Kryeministri Rama tha se tani e ka radhën qeveria të kalojë nga mbështetja parimore në mbështetjen financiare. Rama bëri të ditur se brenda 48 orësh do të takohet përsëri me përfaqësinë e naftëtarëve për të kaluar në veprim.
“Jam i kënaqur që naftëtarët e pranuan propozimin e qeverisë. I falenderoj për mirëkuptimin dhe besimin. Tani e ka radhën qeveria të kalojë nga mbështetja parimore në mbështetjen financiare. Pa humbur kohë. Brenda 48 orësh do takohem përsëri me përfaqësinë për të kaluar në veprim”, – theksoi Rama. Më herët kryetari i sindikatës së naftëtarëve, Sokol Dautaj, tha se “sot kemi zhvilluar një takim me pjesën më të madhe të kolegëve naftëtarë, duke parë gjendjen e vështirë në të cilën ndodhen kanë pranuar që të rikthehet një përgjigje pozitive për pagën. Për problemet tona për pagat e prapambetura, do të vazhdojë rruga gjyqësore”.
“Duke mos arritur një zgjidhje dje me qeverinë e cila ia delegoi këto paga kompanisë private ne do ta vazhdojmë betejën gjyqësore deri në Strasburg”, – tha Dautaj. Dautaj tha se “kryeministri Rama premtoi për një pagë ndërmjetëse midis pagës minimale dhe asaj që marrim në rafineri. Nga punëtorët u gjykua e arsyeshme duke parë anën e dobët ekonomike, pasi prej 11 muajsh ne nuk marrim asnjë ndihmë financiare asnjë llloj page. Punëtorët të detyruar nga kushtet ekonomike e pranuan këtë gjë”. Ai u shpreh se pjesa më e madhe e punonjësve janë dakord me ofertën, ndërsa bëri të ditur se “sot do iu dërgojmë një mesazh që të ulen palët një orë e më parë”.
