Ka nisur zyrtarisht fluksi i udhëtarëve në Portin e Vlorës me mbërritjen e tragetit të mëngjesit European Star, i cili transportoi rreth 400 pasagjerë dhe 120 automjete. Ndërkohë, gjatë ditës pritet edhe trageti i dytë, Ionian Star, i së njëjtës kompani, me rreth 450 pasagjerë dhe 130 automjete. Kjo shënon një nisje mjaft pozitive të sezonit turistik, duke konfirmuar pritshmëritë për një verë të suksesshme në Portin e Vlorës. Në orën 07:00, menjëherë pas mbërritjes së tragetit të parë, në port ishte e pranishme edhe Prefektja e Qarkut Vlorë, Evis Alushi, e cila u uroi turistëve pushime të mbara dhe mirëseardhje në Shqipëri.
Vizita e saj kishte gjithashtu për qëllim ndjekjen nga afër të masave organizative dhe të sigurisë të marra nga autoritetet portuale për përballimin e fluksit të sezonit veror. Prefektja shoqërohej nga Komandanti i Kufirit, Agron Biti, si dhe Drejtori i Portit të Vlorës, Valdet Bello, të cilët theksuan se porti është në gatishmëri të plotë, me të gjithë personelin në dispozicion për të garantuar një proces të shpejtë dhe të sigurt të zbarkimit dhe imbarkimit të pasagjerëve.
Nga ana tjetër, Policia Kufitare, nën drejtimin e drejtorit të ri Arbër Zemani, ka marrë masa shtesë për të përballuar fluksin e lartë të udhëtarëve. Janë vënë në funksion 8 sportele për kontrollin e automjeteve dhe 6 sportele brenda terminalit për kontrollin e pasagjerëve këmbësorë, duke shmangur vonesat dhe duke garantuar një shërbim sa më efikas. Organizimi i shkëlqyer i Policisë Kufitare, profesionalizmi i autoriteteve portuale dhe mikpritja e treguar nga Prefektja e Qarkut, Evis Alushi, krijuan një atmosferë pozitive që në ditën e parë të sezonit, duke lënë një përshtypje të mirë te turistët dhe udhëtarët që zgjodhën Portin e Vlorës si pikën e hyrjes në vend.
