Kryeministri Edi Rama deklaroi sot nga Korça se programi i Partisë Socialiste është puna dhe për këtë ka një plan veprimi. “Ne kemi një Plan Veprimi. Ne do të heqim tatimin mbi pagat deri në 40 mijë lekë. Nëse deri sot vetëm paga minimale nuk paguan taksa, nga 1 janari i 2022-it, të gjithë ata që paguhen deri në 40 mijë lekë nuk do të paguajnë më taksë. Kjo nuk është pak, kjo është e rëndësishme”, u shpreh Rama.
“Tani ata që marrin deri në 40 mijë lekë dhe qenkan me PD apo parti të tjera, – shtroi pyetjen Rama, – janë të gatshëm ata që të votojnë për t’i vënë vetes taksën 9 %? “Sot e kanë minimale taksën mbi pagën, sepse ne kemi tjetër model. Ne themi: kush fiton më pak, paguan më pak dhe sa më lart të ngjitesh, aq më shumë duhet t’i japësh shtetit.
Ata thonë e kanë të të gjithë njëlloj, por nuk është njëlloj, se kur thonë 9 % taksë mbi një pagë 40 mijë lekë të fut në ankth se çfarë do të paguash më parë nga detyrimet e muajit, kurse 9 % te ai që merr 10 milionë lekë nuk ndjehen kur vjen puna te detyrimet e muajit”, deklaroi Kryeministri. Pra, nuk është njëlloj, është e kundërta, tha Rama, pra kush fiton më pak, paguan më shumë me taksën e sheshtë.
Megjithatë, informoi Rama, “atyre që kanë një pagë nga 1.2 milionë lekë deri në 2.5 milionë lekë, ku taksimi ynë progresiv e ka barrën më të lartë, ne do t’ua ulim këtë barrë nga 1 janari 2022”. Sipas tij, këto nuk janë premtime elektorale, pasi u shpreh ai, ne jemi në punë. “Ne po themi si do të vazhdojmë punën”, deklaroi Rama.
