Nga Dritan Leli
Pas një ndërprerjeje të gjatë të procesit mësimor, ky ishte takimi i parë virtual i një cikli takimesh që do të zhvillojmë, në ditët në vijim, me drejtorët e shkollave, të të gjitha cikleve, në Vlorë.
Në bashkëpunim me Drejtoreshën Alma Bakiu si dhe drejtues të shkollave 9 vjeçare, përkatësisht të shkollave Ibrahim Kushta,Marigo Posio, 15 Tetori Jani Minga,Avni Rustemi, Zenel Murro, Zigur Lelo,sot diskutuam rreth gjendjes aktuale, nevojat e shkollave, masat mbrojtëse dhe gjithë udhëzimet e publikuara dje nga Ministria e Arsimit. Me virusin ende në qarkullim në shkallë botërore, shoqëria po përgatitet për një “realitet të ri”, në të cilin arsimi mund të jetë ndryshe nga sa kanë njohur nxënësit, mësuesit, prindërit dhe komuniteti.
Udhëzuesi dhe ne të gjithë, synojmë të ndikojmë në përgatitjen e shkollave që të jenë fleksibël në planifikimin dhe në organizimin e procesit mësimor, të gatshme për t’u ofruar nxënësve mjedise të sigurta duke respektuar rregullat e distancimit fizik dhe masat e tjera mbrojtëse, si dhe të afta për t’u përballur me pasojat e pandemisë COVID. Që shkolla ta përmbushë këtë synim, nevojitet planifikim, angazhim i të gjithë aktorëve në sistemin arsimor dhe rishikim e ndryshim i planeve në varësi të ecurisë së pandemisë.
