Autoveturat e prodhuara 10 vjet më parë nuk janë lejuar këtë të hënë të hyjnë në territorin e Republikës së Shqipërisë.
Çdo mjet i prodhuar para vitit Dhjetorit të vitit 2008, i nisur drejt vendit tonë, nuk është pranuar të zhdoganohet.
Por doganat kanë refuzuar të zhdoganojnë edhe mjetet e futura më parë në Shqipëri, por që nuk kanë kryer procedurat e zhdoganimit.
I tillë është rasti i një qytetari, që e ka sjellë makinën e tij prej muajit Maj të këtij viti.
“Kam një ‘Opel Zafira’, është e vitit 2007. Kam që në muajin Maj këtu dhe erdha për zhdoganimin. Na thonë që në datën 2 ka hyrë në fuqi një ligj që nuk e lejon zhdoganimin”.
“Shumë mjete kanë hyrë përpara miratimit të këtij vendimi dhe sot më vijnë në zyrë dhe nuk u përgjigjëm dot për kryerjen e doganës. Të paktën për 3 qytetarë nuk kam vepruar dot. Një nga qytetarët e ka makinën të 2002 dhe ka hyrë në Qershor të 2018 dhe unë nuk i kryej dot procedurën e zhdoganimit”, thotë agjentja doganore Afërdita Kraja.
Shkak është bërë vendimi i Këshillit të Ministrave për të mos lejuar importin e automjeteve me mbi 10 vite prodhim pas datës 2 Dhjetor 2018.
Në Drejtorinë e Përgjithshme të Trasportit Rrugor shpjegojnë se ky vendim nuk parashikon asnjë përjashtim.
“Doganat nuk mund të zhdoganojnë mjete më shumë se dhjetë vjet, kjo është detyrë e Drejtorisë së Doganave”
Në vendin tonë rezultojnë në qarkullim rreth 490 mijë mjete që janë me mbi 10 vite prodhim. Vetëm dy muajt e fundit pas bërjes publike të vendimit për ndalimin e automjeteve të përdorura, në DSHPRR janë regjistruar 7727 automjete. Ndërkohë automjetet, të cilat tashmë kanë hyrë në territorin shqiptar, por nuk kanë përfunduar procedurat e regjistrimit të targave, kanë afat deri në 1 Mars 2019 për kryerjen e procedurave të nevojshme, pas kësaj date nuk do mund të regjistrohen.
