Nokia 2.3 është telefoni më i ri Android One Nokia e ka prezantuar Nokia 2.3, telefonin e vet më të ri Android One, i cili bie në segmentin buxhetor dhe do të shitet me një çmim prej 109 €.
Nokia 2.3 është telefon i thjeshtë i bërë nga polimeret. Në pjesën e përparme të pajisjes është një ekran 6.2 inçësh, 720p me notch. Në pjesën anësore ndodhet butoni i dedikuar për Google Assistant. Pjesa e pasme është bërë nga materiali 3D me nano-teksturë, ndërsa pajisja do të jetë në dispozicion në variantet Cyan Green, Sand dhe Charcoal.
Telefoni e përdor çipsetin MediaTek Helio A22, 2 GB RAM dhe 32 GB hapësirë të zgjerueshme për ruajtje, shkruan KOHA Ditore. Dy kamera janë të pranishme në pjesën e prapme, me sensor kryesor 13MP f2.2 dhe sensor të thellësisë prej 2MP. Në pjesën e përparme është kamera për selfie 5MP f2.4, e cila gjithashtu e mbështet face unlock.
Nokia 2.3 ka bateri prej 4000mAh, për të cilën kompania pretendon se i ofron dy ditë punë me një mbushje. Sistemi operativ është Android One (Android 9), ndërsa Nokia i premton dy vjet azhurnime të Androidit dhe tre vjet azhurnime mujore të sigurisë.
