Deputeti i PS, Eljo Hysko ishte i ftuar në studion e Fax News ku foli për situatën politike në vend dhe nuk hezitoi të thumbonte kryetarin e PD, për të cilin ngriti pyetjen se me cfarë platforme vjen për komunikimin me qytetarët. Kur po bënte krahasimin mes Ramës dhe Bashës, Hysko filloi të qeshte dhe tha se nuk e kupton përse të gjithë qeshin kur e cilësojnë si pretendent për kryeminstër. “Unë nuk besoj që ka shqiptarë sot që në një ditë të vështirë si tërmeti apo pandemia, ndërmjet kryeministrit aktual dhe pretendentit, të gjithëve u vjen një buzëqeshje kur e thonë këtë, nuk e kuptoj pse, zotit Basha apo të gjithë zotërinjve, zonjushave apo zonjave që vijnë nga Basha se nuk është i vetëm.
Basha është një i replikuar në 4, i udhëhequr nga 2 dhe me 8-9-10 aleatë të tjerë që nuk e di me çfarë platforme po vijnë në komunikim me qytetarët. Nuk mund të themi që PS e qeverisë Rama është më e mira, por po bëjmë atë që mundemi”, tha Hysko. Ndërkohë nuk la pa komentuar masën ndëshkuese për ata që nuk vënë maskën në cdo ambient. Si një person që e ka mundur një herë betejën me Covidin, Hysko thotë se është virus i pabesë dhe njerëzit nuk janë të frikësuar nga gjoba, por po bëhen vigjilentë për pasojat që sjell sëmundja.
“Mjafton të shohin nëpër rrugica, të gjithë veçanërisht mosha e tretë por edhe një pjesë e konsiderueshme të të rinjve po e respektojnë këtë masë. Po e respektojnë sepse po bëhen vigjilentë për problematikat që sjell Covid-19. Nuk mendoj që një masë kaq e madhe qytetarësh do frikësohej nga gjoba nëse do kishte bindjen për të qenë të kujdesshëm. Gjoba duhet të frikësojë ata që nuk e shohin të arsyeshme. Virusi është i pabesë. Nuk është shaka, është e keqe me të cilën duhet të luftojmë. Është më shumë një luftë nervash që ka nevojë për disiplinim të hekurt dhe vetëm kështu mund ta mposhtim”, tha Hysko.
