Pak ditë më parë, një studim i Lancet dhe OBSH tregoi se më shumë se 1 miliard njerëz në botë tani po jetojnë me obezitet. Të dhënat e studimit tregonin se në mbarë botën, obeziteti tek të rriturit është më shumë se dyfishuar që nga viti 1990 dhe katërfishuar tek fëmijët dhe adoleshentët (nga 5 deri në 19 vjeç).
Por ashtu si në botë, obeziteti po kthehet në një problem shqetësues edhe te fëmijët në Shqipëri. Ekspertët e shëndetit publik thonë se situata është alarmante pasi obeziteti tani është zhvendosur te moshat e vogla. “Situata është alarmante përsa i përket faktit që mbipesha dhe obeziteti tashmë është zhvendosur edhe në moshën fëminore. Në në nivel botëror, obeziteti është dyfishuar tek të rriturit, për fat të keq është 4-fishuar tek fëmijët dhe adoleshentët. Mbi 1 miliardë njerëz sot vuajnë nga obeziteti”.
Të dhënat tregojnë se 5% e vajzave të moshës 5-19 vjeç janë obeze ndërsa tek djemtë niveli arrin në 10%. Tek popullsia adulte nivelin më të lartë të obezitetit e kanë gratë. “Nëse do shohim tek femrat nga 14%, jemi në vlerat e 26%, ndërsa për meshkujt nga 21% në 22%. Dietat e pashëndetshme dhe ulja e aktivitetit fizik janë nga faktorët bazë që kanë sjellë rritje të këtyre shifrave”.
Por obeziteti, sipas ekspertëve, bëhet shkak edhe për sëmundje kronike apo edhe probleme të shëndetiti mendor. “Diabeti, sëmundjet kardiovaskulare apo edhe disa lloje kancerash. Për të mos folur pastaj trajtimi është akoma më i vështirë sepse njerëzit ndihen përballë një stigme lidhur me peshën e tyre që i bën ata t’i drejtohen më me vështirësi shërbimit shëndetësor, duke sjellë pastaj edhe pasoja te shëndeti mendor”.
