Shpërblimi i fundvitit për pensionistët mbetet ende në pikëpyetje. Pavarësisht propozimit të Komisionit të Ekonomisë për përfshirjen në ndryshimet e buxhetit, Ministria e Financave theksoi se më parë do të duhet të shihen të ardhurat. Qeveria ende nuk ka një vendim përfundimtar për të dhënë një shpërblim në fund të vitit. Në diskutimin për ndryshimin e buxhetit për shkak të tërmetit, kryetari i Komisionit të Ekonomisë ka kërkuar përfshirjen e fondeve të fundit të vitit në këtë akt.
Ahmetaj: Ne kemi marrë angazhim politik dhe financiar. Është kthyer tashmë në traditë që shpërblimi i pensionistëve dhe familjeve në nevojë është pjesë e politikës financiare, fiskale të qeverisë, të Kryeministrit, në fund të vitit. Por për ministren e Financave, Anila Denaj, gjithçka do të varet nga realizimi i të ardhurave në buxhet.
Denaj: Ministria e Financave do të analizojë kërkesën e bërë nga ky Komision. Kjo kërkesë ka ardhur më vonë sesa ky akt normativ është përpunuar. Do të shikojmë të gjithë vlerësimet të cilat kanë të bëjnë me zërat e shpenzimeve. Kreu i Komisionit të Ekonomisë, Arben Ahmetaj, ishte kritik ndaj Ministrisë së Financave, duke i propozuar që të bëhet kujdes me detyrimet e prapambetura pasi po krijojnë një barrë në buxhet.
Ahmetaj: Ministre kam merakun që në fund të vitit si Ministre përgjegjëse do ta keni ju në kurriz pavarësisht se nuk i krijoni ju këto detyrime. Por Ministrja e Financave theksoi se ka pasur një ulje të detyrimeve si 9 mujor nga 115.6 në 115.2 mld lekë për këtë vit.
Denaj: Është një proces që shkon paralelisht dhe këtë desha ta trajtoja. Aktualisht ende nuk ka një faturë nga dëmet e tërmetit. Ndërsa në total buxheti shkurtohet me 30 mln dollarë, e ndikuar nga mosrealizimi i të ardhurave.
